| Home | Local News | Opinion and Editorial | Features |RSS

Sunday, April 23, 2006

Laban o bawi?

(DIGHAY ng DERETSO, Abril 22, 2006) Isa ‘lang ang dapat piliin ni Biteng kung nais niyang mawala ang kanyang sakit ng ulo o manatili ang sakit ng ulo sa kinakaharap niyang kaso sa Sandiganbayan.

Pamimilian niya ang mag-mayor muli o laya.

Sa arraignment kasi kung magpi-plead siya ng Not Guilty, Your Honor, ‘eh nakakatiyak may pagkakulong dahilan na rin sa tindi ng mga ebidensiya na ihaharap ng panig ng tagausig, lalo na nga ngayon at ie-airtight na nila ang kaso sa pamamagitan naman ng pagsusumite sa Sandigan ng amended informations.

Private transactions daw ang kontrata sa pagitan nina Abdon Andal at ng Informatics. May utang si Andal kay Biteng kaya’t ito (Biteng) na ang tumanggap ng bayad ng advance payment ng Informatics, taliwas sa sabi ng tagausig na ibinulsa niya ang bayad ng Informatics at dummy pa nito si Andal. Kaya nga’t angal pa nila sa Sandigabayan ay wala itong jurisdiction na litisin doon ang kaso. Mas type nina Biteng na sa Regional Trial Court na lamang litisin ang kanilang kaso.

Ang siste’y tila sirang plaka sa pandinig ng mga justices ang istoryang iyon kaya’t kailangan na siyang mabasahan ng kaso at sa proseso na lamang ng hearing ay doon niya patunayan ang linyang iyon. Na kapag nangyari’y baka lalo pa siyang madiin.

Kung sa pagbasa ng sakdal sa May 26 ay aaminin niya ang kasalanan, bababa ng one degree lower ang sintensya sa kanya na kung susuwertihin pa’y baka ma-under provi na ‘lang siya. Samakatuwid, laya siya, as if ‘alang nangyaring kaso sa kanya. ‘Yun nga ‘lang, forever disqualified na siya to hold public office at possible pa ring ipabalik sa kanya ang kung magkano man ang sinasabing ibinulsa niya.

Pero kung gusto pa rin niyang mag-mayor, ‘eh sige ilaban niya ang kaso. ‘Yun nga ‘lang, habang mayor siya at dinidinig ang kaso, ‘eh suspindido muna siya. Pag nagkaganoon, ‘tyak bukod sa watusi’y may panibago na naman siyang alyas, Mr. Mayor Suspindido.

Sa isang banda, hayaan na nga nating makipaglabanan si Biteng sa korte upang kahit papaano’y kumita ang dapat kumita. Siyempre una na dito’y ang iba’t ibang sikat (‘pag may nadilehensya) at ‘di sikat (‘pag napurnada ang pagpapasa ng kung anu-anong panukala sa konseho) na mga law firm sa Ermita, Escolta o Makati. Pangalawa’y ang bulong brigade na nagpapalakas ng loob sa kanya sa pagsasabing ‘Lusot ka ‘dyan bosing, malinis ang pagkakadale mo.’ Pangatlo’y ang palahaw brigade na taga bando ng mga kasaninungalingan sa pagsasabi naman sa publiko na, ‘Alang kaso si bosing, panay paninira ‘lang ‘yan sa kanya.’ At pang-apat ay ang mga doktor o albularyo na magse-certify na ‘Peks man mamatay man si Abi Yu ‘eh nasuri namin na nagkakulane sa singit si Biteng kaya’t ‘di nakadalo sa hearing.’

Hamo na ngang makipagdakdakan siya sa Sandigan para naman at the end of the day ‘eh makita natin kung papaano siya mag-mayor sa Munti.

Ika nga’y Biteng can’t get the best of both world.

Fair deal?

Papano ba Biteng, Laban o Bawi?

P.S. Habang sinusulat ang DIHAY na ito’y narinig namin sa TV Patrol ang sinabi ni Fr. Joaquin Bernas, S.J. patungkol kay PGMA: Palitan ang mga adviser. Sana nga’y narinig din ito ni Biteng upang kahit papaano’y mapagbatayan din niya sa kanyang pagmumuni-muni.



Kinakabuyaw

(DIGHAY ng DERETSO, Abril 8, 2006) Binabalak ngayon ng Amante administration na lagyan ng mga stall ang kahabaan ng P. Paterno street sa may bahagi ng mga nakatayong business establishment.

“Pinulong na kami nina Atty. Marius Zabat at Fe Abril,” ayon sa ipinarating na hinaing sa DERETSO ng mga maaapektuhan. Si Zabat ang siyang secretary to the mayor at si Abril naman ang market superintendent ng Lungsod ng San Pablo.

Kung tama ang DIGHAY ng DERETSO, baka mga bakal ang itatayong stall. Ito kasi ang unang plano ni Mayor Vicente Amante noong kasalukuyang ginagawa pa ang palengke at nagkaroon ng problema sa pagpupuwesto ng mga manininda.

Mga ambulant vendors ng gulay at isda ang balak ilagay doon noon. Na ngayon nga’y itutuloy na rin pala.

“Beyond the commerce of men” ang kalsada ayon sa desisyon ng Korte hinggil dito. Subalit naiintindihan ba ito nina Zabat at Abril upang kahit mali sa batas ay buong gilas nilang sundin ang kautusang iyon ni Amante?

Wala na nga bang puwang ang mga maliliit na manininda sa palengke gayong hanggang sa sinusulat ang DIGHAY na ito’y nakatiwangwang pa rin ang 3rd floor ng Mall at maging ang Mall Two?

Sinsero ba si Amante na mabigyan ng permanenteng lugar ang maliliit na manininda dahil sa kanilang boto? O panggigipit ito sa mga nakatayong business establishment doon sapagkat hindi pa niya nakukuha ang gusto niya? Ano nga ba ang talagang gusto ni Amante sa mga lokal na negosyante? Pera para may magastos sa kasong kinakaharap niya sa Sandiganbayan? At bakit niya kailangan ng pera? Para ipanglagay sa mga Sandigan Justices? Kaya ‘nya bang bilhin ang mga Sandigan Jusitces?

At upang matakpan ang tunay na mga usaping bumabalot sa klase ng pamumuno ngayon ni Amante’y patuloy nitong ipinapain ang libreng sakay sa ambulansiya ng pamahalaan… at humabol pa ng maantot na propaganda para sa Mahal na Araw: Isang dambuhalang tarpoline ang nakabandera ngayon sa city plaza na nagsasabing magtatayo siya ng San Pablo City General Hospital.

Alam kaya ni Amante na hindi na ngayon sampu singko ang mga doktor at nurses? Naipaliwanag na ba ni Amante sa publiko kung bakit naging puting elepante ang City Emergency Hospital na itinayo sa Greenvalley Subdivision sa Brgy. San Francisco sa panahon ng kanyang unang siyam na taong panunungkulan upang ngayon nga’y buong hambog niyang ipagbabanduhan ang pagpapatayo naman ng SPC General Hospital?

Kung hindi magpapakita ng hayagang pagtutol sina Pablo’y sa mga kaanuhan ni Amante, asahang sa darating na Mahal na Araw ay muli na namang mapapako sa krus ng kapighatian ang kalakhang mamamayan ng San Pablo City.

Ano ang bottomline? Kinakabuyaw lamang tayo ni Amante… ang maniwala sa kanya’y siyang maglalagay ng pakong ibabaon sa ating mga kamay.